Poetry

દૂરના શું પાસના…

દૂરના શું પાસના; સંબંધ કેવળ શ્વાસના,
દોડવું ને હાંફવું આ ઝાંઝવા આભાસના.
ભીતરેથી ના હણી શકતા અસુરી તત્ત્વ ને,
ક્યાં લગી બાળ્યા કરીશું પૂતળાઓ ઘાસના.
આશ ડૂબતી સૂર્ય સાથે વ્યાપતું અંધાર જગ,
ને જટાયુ સમ ઝઝૂમે કોડિયા અજવાસના.
વેદના અંકુર થઈને ફૂટતી મારા હ્રદય,
કોણ જાણે બીજ ત્યાં વાવી ગયું અહેસાસના.
રક્તટશરોથી લખી છે ઓ વતન તારી કથા,
ધૂળમાં ધરબાઈને ઝંખું વરસ સહવાસના.

શબ્દસૃષ્ટિ, ફેબ્રુઆરી ૨૦૧૯


આંખમાં આંસુ ભર્યા ને…

આંખમાં આંસુ ભર્યા ને હોઠ પર છે સ્મિત પણ,
કંઠમાં ડૂસકું દબાયું ને ગળામાં ગીત પણ.
શ્વાસ ને ધબકારની સંડોવણી કાયમ રહી,
એ વિના શોધી રહ્યો છું જિંદગીની રીત પણ.
સ્વપ્ન મારી આંખમાં ખટકી રહ્યું છે જો મને,
ભૂલ મારી એટલી મેં સંઘર્યો અતીત પણ.
બંધ ઘરને પૂછ ના તું કોઈ પણ સ્વજન વિશે,
આંગણાની સાથ રડશે બારણાં ને ભીંત પણ.
પ્રેમમાં હોતા નથી કાયમ કિનારા, હા વિજય
હોય છે કોઈ ક્ષણે ડૂબી જવામાં જીત પણ.


હૃદયથી…

હૃદયથી લાગણીભીનો ફરી વહેવાર માંગુ છું,
ઉજાણી થાય અંતરથી એવો તહેવાર માંગું છું.
રૂઝાવા દે જખમને તું પછી અજમાવ નખ તારા,
હું મારા દર્દનો હરપળ નવો અવતાર માંગું છું.
ઉઠાવી સોંય શંકાની જગત પૂછતું રહ્યું પ્રશ્નો,
હું તારી વાતના છેડે ભલો ઉદ્‌ગાર માંગું છું.
ખરીને ડાળથી પીળાં થયેલાં પાંદડાંમાં શું?
લીલા તોરણ મહીં જે હોય એ શણગાર માંગું છું.
અગર આ પ્રેમ કરવો હો ગુનો મંજૂર છે અમને,
‘વિજય’ને ચાહનારો એક ગુનહગાર માંગું છું.

ફિલિંગ્સ, ૧ જાન્યુઆરી ૨૦૧૪


સમયની ચાલ…

સમયની ચાલ બદલાઈ અને ફંટાય છે રસ્તા;
મને માફક નથી એ મંઝીલે બંધાય છે રસ્તા.
સમીપે હોય તું તો જોજનો ચાલ્યા જ કરવાનું;
ચરણ એકલ ઉપાડ્યા તો મને ગંધાય છે રસ્તા.
નથી મારા કહ્યામાં લ્યો હવે મારા જ પડછાયા;
સૂરજને દઉં જરા ઠપકો અને સંતાય છે રસ્તા.
અરે ! આ કોણ મારા ઘર લગી પગલાં મૂકી ગયું;
ગલી મારી હતી બદનામ ને પંકાય છે રસ્તા.
વતનની વાટ, ખેતર, ખોરડું સઘળું છૂટી ગયું;
રહ્યું જે શેષ એ હૈયે જડી ગંઠાય છે રસ્તા.
વિના કારણ વરસવાની પછીતે ઝાંખ તું ‘વિજય’
દઈને મોકળા મેદાન, સકંજાય છે રસ્તા.

ફિલિંગ્સ, ૧૫ મે ૨૦૧૨