Posted in Poetry

પ્રેમમાં હોતા નથી કાયમ કિનારા…

આંખમાં આંસુ ભર્યા ને હોઠ પર છે સ્મિત પણ;
કંઠમાં ડુસકું દબાયું ને ગળામાં ગીત પણ.
શ્વાસ ને ધબકારની સંડોવણી કાયમ રહી;
એ વિના શોધી રહ્યો છું જિંદગીની રીત પણ.
સ્વપ્ન મારી આંખમાં ખટકી રહ્યું છે જો મને;
ભૂલ મારી એટલી મેં સંઘર્યો અતીત પણ.
બંધ ઘરને પૂછ ના તું કોઈપણ સ્વજન વિશે;
આંગણાની સાથ રડશે બારણા ને ભીંત પણ.
પ્રેમમાં હોતા નથી કાયમ કિનારા – હા, વિજય
હોય છે કોઈ પળે ડૂબી જવામાં જીત પણ.